Mədəniyyət İşçiləri Həmkarlar İttifaqı üzvlərinin əmək hüquqlarının qorunması, onların iş şəraitinin yaxşılaşdırılması və qanunvericilik çərçivəsində müdafiəsi istiqamətində daimi fəaliyyət göstərir.
Əmək hüquqları – hər bir işçinin layiqli iş, ədalətli əməkhaqqı,
təhlükəsiz şərait və sosial təminat hüququnu özündə ehtiva edir. MİHİ, üzvlərinin
bu hüquqlardan tam şəkildə faydalanması üçün hüquqi məsləhət xidməti göstərir,
mübahisəli hallarda onları təmsil edir və məlumatlandırıcı tədbirlər həyata
keçirir.
Azərbaycan Həmkarlar İttifaqları Konfederasiyası beynəlxalq təcrübədə həmkarlar
ittifaqları tərəfindən tez-tez səslənən “Bir nəfərə vurulan zərər hər kəsə
vurulan zərərdir...” devizini əsas götürməklə əmək və sosial-iqtisadi
hüquqların müdafiəsini, eləcə də əmək münasibətlərini tənzimləyən digər məsələlər
üzrə fəaliyyət göstərir.
Əmək insanların layiqli formada yaşaması üçün vacib elementlərdən biri olmaqla
yalnız onların yaşayışını deyil, həmçinin fərdi inkişafı və ümumilikdə cəmiyyətin
təməlinin möhkəmləndirilməsini təmin edir. Layiqli əmək və onun müqabilində
verilən ədalətli əməkhaqqı fərdin şəxsi, peşə və həyat keyfiyyətinin
inkişafında mühüm rol oynayır.
Azərbaycan Respublikasının Konstitusiyasının 35-ci maddəsində də göstərilir ki,
“əmək fərdi və ictimai rifahın əsasıdır”. Məhz bu səbəbdən Konstitusiyamızın
preambulası Azərbaycan xalqının ədalətli iqtisadi və sosial qaydalara uyğun
olaraq hamının layiqli həyat səviyyəsini təmin etmək niyyətini bəyan edir.
Konstitusiyanın 12-ci maddəsində vətəndaşların layiqli həyat səviyyəsinin təmin
edilməsinin dövlətin ali məqsədi olduğu qeyd olunub, bunun nəticəsi olaraq həmin
məqsədin təminat vasitələri Konstitusiyanın müxtəlif maddələrində öz əksini
tapıb. Belə ki, vətəndaşların əmək münasibətləri sahəsində layiqli həyat səviyyəsini
təmin edən və qoruyan başlıca konstitusion təminatlar 35-ci (Əmək hüququ) və
58-ci (Birləşmək hüququ) maddələrdə yer alır. 58-ci maddə işçilərin öz
hüquqlarının müdafiəsi hərəkatında təşkilatlanmasını və qanuni mənafelərini
layiqincə qorumalarını təmin etmək məqsədilə hər kəsin istənilən birlik, o cümlədən
siyasi partiya, həmkarlar ittifaqı və digər ictimai birlik yaratmaq və ya
mövcud birliyə daxil olmaq hüququnun olduğunu təsbit edib.